老羅難民營生捱 (04/07/21)

計時間過得好快，離開越南到澳洲定居都四十多年，從踏入澳洲就一直貢獻社會至今，從未唞過，都係時候停底享吓休閒生活，唔經唔覺退休都就嚟兩年，呢兩年全世界人類嘅運氣都係麻麻，冇乜運行，可能只有一部份人士靠投機趁新冠肺炎疫情賺錢發大財，危機，危機，有危就有機，佢哋就趁呢個機發達。當然自己係前者一份子，病毒打亂我嘅退休計劃，打算退休後趁雙腳仲靈活，享受一吓遊埠樂趣，可惜通通變成泡影，好彩，响疫症發生早期時都遠飛歐洲一行，之後日子只可在家居五公里範圍內行走，困足足一年，唯有將多年來家中績聚嘅瑣碎事一一清理，打發時間。

目前無所事事，得閒過頭，番睇當年在吉祥如意網站寫下之逃難史，點知又勾起我當年另一段故事。唔知係唔係依家有老人痴呆症，逢襯有呢個病一般近期發生嘅事就乜都唔多記得，陳年舊事就歷歷在目 ， 好喇！開場白講完！係咁就同大家講吓 ----- 老羅再想當年之難民營生捱。雖然那些都係陳年舊事，四十幾年前，仲有乜嘢好提，但我都想寫低今生自己有這一段經歷，同大家分享吓，兼且希望能夠勾起曾經逃難船民本人嘅事績。( 各位船民朋友：能有今天，安居樂業，其實得來不易)

續上回講到，乘坐之偷渡船行咗四日三夜，到第四日(24-01-1979)早上遇上一艘馬來西亞漁船，漁民指點方向：高叫比東，比東，因當年越南偷渡船頻頻遇上泰國海盜洗劫，船長又點會相信漁民指路，都唔知係唔係點條黑路，信佢都儍，一於借咗聾耳陳隻耳，聽唔到，聽唔到，照向陸地方向航行，(因為唔相信忠告，就冤枉捱多兩個月苦，遲咗兩個月先至入住比東難民營)。 

冇幾耐，船行近海岸，  見海灘上有一大批人向我們揮手，之後突然出現數名武裝軍人，將所有人驅趕離開海灘，軍人在沙灘上向我們叫喊，因為怕船太靠近岸邊會擱淺，所以船停泊離岸較遠，聽唔到軍人講乜，唯有將船拋錨等待下一事情發展，時間大約過咗兩個鐘頭，船主及船長決定派人游上岸懇求救援 ， 船長及另一位人士，自薦奮勇做使者游上岸，誰知這倆位勇士，一上岸就俾軍人打到跪地求饒，我們目睹一切，真係戥佢哋閉翳，船主及大工( 舵手) 知事情不妙，若時間再拉長，軍人上報叫海警船到，咁就弊！  一定拖船離開，分分鐘拖出公海，所以船主決定，一於搏一搏，起錨、船開足全馬力，衝呀衝，哈哈，係咁條船就正衝上岸，船頭擱淺，一迅間船就俾海浪推到打橫，與海岸平排，當海浪打上另一邊船身，另一邊就傾斜，係咁船邊就離沙灘唔係好高，船民就分分跳船，我當時正在船接近岸那邊，等船一傾斜到最近岸時就嗱嗱啉幫啲老人及小孩跳落船，當然我啲家人一早就跳晒落船，可憐第一批跳船嘅年青傢伙，俾軍人用搶柄追打，馬來兵都算有小小人性，婦女見男士被追打，齊齊用身替男士遮擋，係咁先至避免一場血腥慘劇。

冇幾耐，船俾海浪打到非常斜，我都怕船會翻，都係自己條命緊要啲，三十六着，跳為上着。這一跳，就結束我呢生冒著生命危險都要投奔自由嘅艱苦經歷旅程。繼續下一個人生旅程又即刻開始，難民生捱。

所有船民獲集中於沙灘上，大約過了一段時間，來了另一批軍人，我諗可能其指揮官見船已經擱淺，冇可能軀趕我們回到海上，當時海潮亦開始退，所以船身已經陷入沙灘上，就允許部份人上船將船上所有物件帶上岸，等他們檢查，您知啦，唔遇上泰盜，就遇上馬賊，都算好，所有貴重物品都通通被攞走，但佢哋唔會做出好似泰國海盜咁狼心狗肺，姦淫擄掠，全無人性。之後所有人獲安排在沙灘上一塊空地，係咁露天過咗一 晚，隔日我家就架起帳蓬 (註--上文提及，當船還在越南等待出發時，我在船上充當做水手，因職權方便，一早諗到，它日要用之需要物件都先帶晒上船，所以處於這種環境，毫無疑問，有備無患，但其它同船船友就有啲狼狽) ，一些家庭若有壯男，之後日子便將船拆散，拆出所有有用物資，來建臨時居所。

頭兩日，因船上所攜帶之糧食太多，足足可以供應全船兩日白粥頂肚，兩日過後開始捱餓，頭幾日因紅新月會(馬來西亞紅十字會) 還未供應糧食，有都非常有限，人人餓到軟晒。最慘係遇上一班衰到貼地嘅軍人，因我們登陸之沙灘係當地一個海岸防衛註守站，軍營在沙灘後面之山上，上岸頭一兩晚，半夜時份，嗰啲註軍趁夜黑騷擾婦女，我們為著保護大家，決定男士晚上在營地四邊註守，點知，好呀！你班男人咁有疆，敢同我作對，阻我搵食，就俾啲顏色你哋嘆吓，夜晚你哋唔瞓覺，日間所有男士就只准坐或企，全部唔可以瞓低，若果俾佢發現，就罰捉落海浸水，浸足幾個鐘。有時命中註定係衰唔晒，某一日，有位高級軍官到訪，原來係馬拉華人，佢又同船主用廣東話交談，咁好機會，船主梗係煮班衰人米啦，告佢哋一狀，向軍官大吐苦水，皇天可憐，隔日全部軍人換走晒，換來了另一批識搵銀嘅軍人。當其時因為我家庭之帳篷最接近軍營，他們就供應物資，讓我家代為賣給船民，(在這個沙灘上，可以稱為臨時難民營，期後兩個月，陸陸續續再有四至五艘難民船登陸，變咗全部大約有五六百人，所以後期買賣生意非常好) 。

話說當日船接近岸邊時，有一批人在岸邊呼叫，之後給軍人驅散，原來軍營旁邊就係PAULAU PESA 難民營，真係唔好彩，這段時間難民營開始關閉，所以唔再接收新難民，變咗我哋冇機會入營，但運氣都算唔差得晒，唔駛講都知，坐船走難所攜帶隨身物品有限，點會帶齊砂煲罌罉，好彩所有煮食用具得到隔離難民營供給。雖然有物資供應，講真問題係點樣去分配，在這個樣樣都缺乏嘅環境下，人嘅本性就係唔會執輸，分小一份都唔掂。因我本人與船主相熟，當時又年青力壯，自從登陸安定後，開始有食糧派發，船主就委任我負責派發糧食，紅新月會所供應糧食都係有數計，如米，即食麵，蛋，麵包等等，都好容易分發，那麼大大細細碗碗碟碟煮食用具都唔知點分，呢個亞婆話要個煲，嗰個亞姨又話要個鑊，亞伯同大叔又要同一樣野，若果派得唔合心意，一定有抝撬，分分鐘打起上嚟，我唯有將全船分組，大約二三個家庭為一組，每組都有相等人數，同時將所有物品亦分成同等小堆篇排好號碼，開始每組人派位代表來抽籤，抽到那份就取那份，之後再由自己組員決定如何分配，總算大功告成。皆大歡喜。

每日大約午間時分，所有要攞食水，就開始集合，由一名軍人帶領到附近一個小村莊從水井打水，路途上經過一片椰林，每個人都金精火眼，目注四週地上，唔係有金執，而係睇有冇椰子，因老椰子多數晚間跌落地，執番個當雜糧，若果發現一粒，直情好似執到寶咁開心。每日嘅生活都係夠鐘攞水，其餘時間就座响樹陰下對著大海閒聊傾偈，或者在炎熱天氣下，趁有微風發個白日夢，又或者落海灘浸吓水消暑。有日在沙灘樹陰下傾偈，突然遠處海面上出現一大片紅色，慢慢漂近岸，原來係蝦群，嘩，個個人衝落海灘，用衫做魚網，撈得幾多得幾多，啲蝦樸面而來，一迅間就消失，哈哈！今餐人人有鮮蝦食，可惜只係蝦毛，都好過冇。

每個船民都唔知到未來嘅日子發生乜事，只係等待，等待，能夠離開共產國家，平安着陸，執番條命，唔駛葬身大海、總算告一段落，時間一日一日過，聯合國高委曾多次到訪，告知會安排船隻到來接送到比冬難民營。

在這個沙灘上足足捱咗兩個月，終於有消息明天有船到來接送，各人執拾好行裝，準備明日離開，各人亦相討好如何安排登船(因船不能太近岸怕擱淺，要渡水上船)。隔日一早，有三艘馬來漁船到來，人嘅醜性又再呈現，一早安排之計劃完全告吹，執輸行頭慘過敗家，個個爭先恐後，衝出海灘，渡水爬上船，場面完全失控，亂晒龍，我家因人數眾多，有老有幼，太危險了，同時三艘船亦不能運載所有人，最後決定留低等下一次，大約八九個家庭留低，在這個沙灘再住多兩晚。兩個月時間與那批馬來軍人相處，多少互有利益，亦建立一段友誼，臨別時還煮咗馬來餐請我們食。

兩日後(24-03-1979)我們終於登上漁船離開，大約航行兩小時，遠處望見一個小島，山上樹林茂密，山下籃色帳篷鋪滿山腳，船越接近小島，只見人頭湧湧，比東島呀比東島，真係名副其實悲痛島，上島登記後，第一件事先搵有瓦遮頭住所，好快有人到來兜售，最後揀到一間較大之排屋可住十多人，買價大約五錢金，總算有個可以避風避雨住所。

當時比東難民營一時之間船民湧入，查實所有設備都不能夠應付所需，尤其係食水，上島後第一個月最為艱苦係排隊領食水，食水都是由內陸用水船運到，每星期兩次，每次就根據船篇排號碼分單雙數領取，當時島上己住上四萬多人，每次可想而知人龍有幾長，唔單止咁仲要响猛烈太陽曝晒下分分鐘排上幾個鐘，正一*鐵木真打仔---大汗耷細汗 ，先至攞到一桶水，場面秩序都非常混亂，因一時之間未預計這麼多船民，水由水船泵上岸灌入大水桶，水桶又高，又大，要從大水桶取水都幾難，差唔多倒水落地多過落桶，非常浪費，亦有人直情跳入水桶嗶水，完全都唔顧及衛生，您話呢啲水飲你唔痾都算大命。其後日子設備開始改善，島上兩個地區建上大水庫，設有水龍頭，方便裝水。同一時間開始建造一所醫院，醫療設備開始改善，當時亦有一艘大型醫護船停留幾個星期，救援病重難民。
    

因到比東難民營前我已經負責分發糧食給同船，到達後亦接手工作，那段時期糧食已改分發糧食包，唔同之前樣樣散裝，每包內包含米，綠豆，糖，鹽，罐頭沙丁魚，及一些雜糧，這些都好容易分發，一人一份，但係久唔久就有啲嘢考起你，有次分發牛潤，亦有次發墨魚，死啦，又冇秤，點分呀，嗰個時刻有肉落肚喎！分多分小都唔掂，之前我己經將人數分組，現唯有將全部組平分為兩組，每組派出一人，兩人之中一位負責將牛潤分二，另一位選擇其中一份，負責分二那位人兄，會好謹慎平分，否則大份會俾對方選走。如此類推，兩組再分四組，四組再分八組，各組自己處理，各人都滿意離開。記得有次有雞蛋分發，只為蛋殼黃與白，就差啲大打出手，我一氣之下，劈炮唔撈，向船主辭職唔再做分糧食代表，期後船主幾番懇求，才繼續擔任。講真，這份工作不易做，因每次領取糧食，我家都全部總動員 ，因我家成員，親戚及朋友，差不多佔全船十份之一，大約二十人多，事關領糧食時，場地人山人海，七國咁亂，若唔夠人手看守，一個唔小心，俾人順手牽羊，抬走幾份，咁就慘！到時真係姜太公封神----漏咗自己，分分鐘連自己份糧都冇埋。

好幸運上岸後遇上好朋友，得佢安排，從而擔任會場秩序員，歸納其隊中，會場秩序分A B 隊每隊有三組，隔日分早午晚三時段看守會場，若有聯合國難民高委，或外國訪問團到訪、我們隊員就負責安排船民見代表，及會場秩序。若晚間代表團要在島上過夜，就由我們把守做保安，同時幫代表團擺好床鋪。人想要有利益一定要做番啲野，記得有次澳洲代表團到訪問，要在島上過夜，點知比東島兩位副寨長，將我們所有隊員趕走，由佢倆位替澳洲代表團擺床鋪，殷勤服侍，冇幾奈，倆人就有名單離島，到吉隆玻驗身去澳洲。所以話近官得力，近廚得食，寨長有積籔，我們也不差，因職場關系常有機會接觸聯合國高委，所以通常都係替人遞信給高委，幫忙寄回越南報平安，回報都係香煙，所以這份會場秩序員都有好多油水。

每次糧包運到，糧包內之罐頭食物大多數係沙丁魚，其中亦有小量罐頭牛肉，(牛肉罐頭從不外發，糧食部扣起，分發俾自己人) ，餐餐沙丁魚，真係食到驚，窮則變，變則通雖然只係沙丁魚，但變出幾十種佳餚，煎，炸，炆，焗，蒸，樣樣出齊，真係丁魚百味，但日日咁食，見到沙丁魚都冇晒胃口。坦白講，正所謂：官場有人好辦事，凑啱我有位好朋友在島上分配糧食部門辦事，好彩有熟人，都可以換一批牛肉，唔駛餐餐捱魚，唔單只分配糧食部門，連發水票部門我都有內應，所以同船船友亦得益不小，這個時期因有大水庫，每星期每人只發二十公升食水，憑票取水，發票部門一星期內收集所有水票後重新分類，(船編號) 及抽起己離島船民水票，星期一又重新派發，我所有之額外水票來源係嗰啲已經離島之廢票，我就將多餘水票分發給同船船友。當時我都唔知幾有水，要幾多都有，想用食水嚟沖涼都可以，哈哈只係飲嘅水，唔係嗰啲水(錢) 。

島上第二個難題係用來煮食之木柴，解決方法係上山斬樹，記得第一次開工，一家所有年青男丁，帶齊食水，乾糧，浩浩蕩蕩上山斬柴，真係懵閉閉，仲古斬一棵大樹就有排用，又唔睇好地形，在溝邊就揀一棵大約350mm直徑之樹開刀，正一床下底斬柴，撞晒板，唉！點知劈倒棵樹，但可惜棵樹冧落嚟時橫跨水溝兩邊，若在樹身上面鋸落就會夾鋸片，要從樹身下面鋸上，但又好難埋手，真係老鼠拉龜，無從下手，攪咗成日，無功而回，有咗呢次經驗，所以下次上山只揀差唔多中等樹身，容易處理，又容易搬運。講到搬運，話講容易其實唔簡單，初時放上肩膊還可以，但路途崎嶇遙遠又要落山，真係越行越重，回程路又要經過狹窄民居，相當之危險，我自己腳指都意外俾撞到骨折，陸路麻煩，于是乎我們改變方針，用海運，在島之山上另一面，(沒有人居住) ， 斬好樹，我們將木頭轆落山腳海邊，然之後利用木頭在水中浮起，慢慢繞過島邊運送，時間比較長,但安全好多。我家有五個男丁，所以上山斬柴唔成問題，最慘有些家庭，只有婦女老人，為咗兩餐落肚都要自己郁手斬樹攞柴，執樹葉樹枝，樹就踞唔到啦！唯有斬嗰啲他人鋸剩底之樹腳，都好可憐，冇法啦！馬死落地行。

難民營內雖然艱苦，但亦充滿鬧熱，在前灘位置罷滿小販地攤，食品，用品樣樣齊，人來人往，非常虛撼，在一個孤島上，邊度有咁多野嚟賣，貨源從邊度供應，奇怪係每晚在會場要守夜時，到午夜二三點，發現好多人搬貨，為著了解，于是乎決定搵晚跟隨睇過究竟,狗上瓦坑，一定有條路，原來小販到難民營後面海灘，等待有一批人專門用自製小木船，撐出大海，同馬來貨船買貨，送回岸轉手賣給小販，不知幾好生意，運貨雖然好揾，但都幾危險，小木船又單簿，撐出大海不知幾遠，如果遇上風浪，打沉船，連人帶貨跌落海，到時連渣都冇晒，但幾好生意都唔夠另一位不勞而獲嘅人兄，係嗰啲島上註守嘅馬來民兵，他們守在必經之路，收買路錢。大家齊齊揾銀。

難民營雖然艱苦，日常生活只顧著領糧食包，排隊取食水，上山斬柴，船民都明白這些困境都係暫一時段，所以每一個都充滿期望，等待，從踏上島那日開始,就期待高委接見，接下來又期待見代表團，最終就係等待揚聲器，公佈自己名單離島到吉隆玻。

當年8月5日早上我還打算上山斬柴，行至半路就聽到有離島名單，喇叭响起SB002 啊！自己船篇號，名單卒之有自己名字，多個月期待嘅消息終於來臨，嗱嗱啉趕返去執拾行裝，等夠鐘上船離島。心情非常興奮，但又依依不捨，將與親人離別，同一班島上會場同事告別，此去將各散東西，希望大家平安，但願它日再能相聚。

集合後點名上船，踏上離島專用船，這個悲痛島生活環境又告一段落，接落嚟又另一個新階段，船慢慢離開悲痛島，島上形態與五個月前完全改觀，來時島上山頭還佈滿密林，依家望上去，凈喺見籃色帳蓬覆蓋全個山頭，樹木全部消失，山頂光禿禿，因當時船民已達至高峰，五萬多難民，因島上從沒有供應生火物資，所以樹林變咗犧牲品。

船大約航行兩個多小時，到達丁加奴港口碼頭，上岸後獲派發飯盒，嗰陣時接近黃昏，之後獲安排上一架大巴士，出發時天已經全黑，巴士向吉隆玻駛去，途中亦曾停留片刻休息，心情帶著興奮兼且彷徨，不知下一環境又如何，半睡半醒，迷糊糊，都唔知車行咗幾遠，天都就快光，最終到達離吉隆玻一個難民轉接中心，登記入寨後，得到朋友安排在一艘停舶在室內之小艇，空間足夠我與太太日常居住，每日中心供應兩餐膳食，早餐就要自己解決，記得每日早上有部麵包車到來兜售，唔知係唔係太耐冇食咁靚嘅麵包，覺得真係好食。朋友識多啲係有著數，正好幾位朋友在比東島會場認識，湊啱在這個中心負責派飯餸，接下來我與太太餐餐全部食餸，都唔駛食飯。入住中心後第二日就獲安排到醫院驗查身體，若驗身冇問題就好快可以起程飛澳洲。呢個時段相信係最開心。有日幸好有識途老馬帶領穿狗窿，跑出營寨上街食早餐，足足大半年，首次能夠嘗試馬來西亞粉麵，尤其係肉骨茶，冇得頂！離定居澳洲日子越來越近，我倆夫妻從小食爺飯著乸衣，都從未落過廚房，今次要到餐餐都食薯仔嘅澳洲生活，到時唔知有冇白飯食，自己又係飯桶，又唔識煮飯，您話點攪，聽人講如果唔想閉翳就最好都係買番個電飯煲，就萬無一失，嗱嗱啉托廚房承投商出外買番個飯煲，有咗呢個架撐到澳洲就唔怕冇飯食。

五日後，因身體健康冇問題，卒之有名單到澳洲定居，從越南解放到踏上澳航班機這一刻，終於得賞所願，感謝上天所賜，亦多謝馬來西亞提供避難所，雖然生活環境辛苦，唔理想，但總算能夠解決這段過度期，自從踏上這塊美麗幸福土地(澳大利亞) 四十多年至今,能夠安居樂業，有個美滿生活，全賴澳洲政府施恩，人道收容，澳大利亞 ，是我國，是我家。感激不盡。